ការប្រកួតប្រជែងមិនមែនសំដៅលើតែការឈ្នះឬចាញ់ ហើយក៏មិនមែនជាការធ្វើឱ្យតែល្អជាងអ្នកដទៃដែរ។ ការប្រកួតប្រជែង ជាពិសេសនៅក្នុងសាលារៀន គឺជាផ្នែកមួយដ៏សំខាន់នៃជីវិតរបស់សិស្ស។ វាអាចជំរុញទឹកចិត្តសិស្ស និងបង្កើនចំណាប់អារម្មណ៍របស់ពួកគេទៅលើការសិក្សា។
ការប្រកួតប្រជែងមិត្តភាព គឺជាការទាក់ទងល្អៗរវាងភាគីប្រជែង ដែលជំរុញឱ្យមានភាពប្រសើរឡើង និងមានសមិទ្ធផលនៅលើភាគីទាំងសងខាង ក៏ដូចជាដើម្បីបង្កើតបរិយាកាសដែលឱ្យមនុស្សគ្រប់គ្នាក្នុងក្រុមមានក្ដីសង្ឃឹមថានឹងធ្វើបានល្អដូចគ្នា ដោយមិនមានអារម្មណ៍ជូរចត់ ឬច្រណែនគ្នាទៅវិញទៅមក។
ការប្រកួតប្រជែងមិត្តភាពផ្ដល់នូវអត្ថប្រយោជន៍ជាច្រើន។ វាបង្ហាញឱ្យឃើញនូវជំនាញ និងទេពកោសល្យរបស់សិស្ស។ ពួកគេអាចរៀនបច្ចេកទេសថ្មីៗ និងអាចធ្វើការជាក្រុមដោយផ្ជាប់នូវផ្នត់គំនិតវិជ្ជមាន។ ការប្រកួតប្រជែងមិត្តភាពក៏ជំរុញឱ្យសិស្សមានទំនុកចិត្តនិងមានគំនិតច្នៃប្រឌិតខ្ពស់។ វាជាវិធីបង្រៀនដ៏រីករាយសម្រាប់សិស្ស។
នៅក្នុងការប្រកួតប្រជែងមិត្តភាព សិស្សត្រូវធ្វើការងារជាក្រុម និងចូលរួមយ៉ាងសកម្ម។ ពួកគេត្រូវបានលើកទឹកចិត្តឱ្យរៀនជំនាញ និងបច្ចេកទេសថ្មីៗ ដោយធ្វើការជាមួយក្រុមរបស់ពួកគេ។ វាមិនមែនជាការឈ្នះចាញ់សម្រាប់សិស្សនោះទេ។ អ្វីដែលសំខាន់នោះគឺសិស្សសប្បាយនឹងការរៀនក្នុងអំឡុងពេលប្រកួត។
សរសេរដោយ៖ អូវែន សុខស្រីឡា