តើអ្នកសុខសប្បាយទេ ស្រ្តីគ្រប់រូប? តើ “ថ្ងៃដ៏មមាញឹក” ជាចម្លើយរបស់អ្នក មែនឬទេ? អ្នកអាចឆ្លើយតាមត្រង់បាន! មនុស្សគ្រប់រូបនៅក្នុងសតវត្សនេះ ហាក់ដូចជាមមាញឹកពេករហូត ភ្លេចយកចិត្តទុកដាក់លើរបៀបរស់នៅផ្ទាល់ខ្លួនរបស់ពួកគេ។ ប៉ុន្តែសម្រាប់ស្ត្រីធ្វើការ ពួកយើងមិនគួរមមាញឹកពេកក្នុងការចាប់ផ្តើមដំណើរឆ្ពោះទៅរករបៀបរស់នៅដែលមានសុខុមាលភាពឡើយ។ ដោយសារតែដំណើរការជីវសាស្រ្ត ស្ត្រីត្រូវយកចិត្តទុកដាក់ជាពិសេសចំពោះរបៀបរស់នៅរបស់ពួកយើង។ ខ្ញុំចាប់ផ្តើមស្វែងរកជំនួយ នៅពេលដែលខ្ញុំដឹងថា ទាំងសុខភាពផ្លូវកាយ និងផ្លូវចិត្តរបស់ខ្ញុំចាប់ផ្តើមកាន់តែយ៉ាប់យ៉ឺន។
នេះគឺជាគន្លឹះមួយចំនួនដែលខ្ញុំចាប់ផ្តើមសាកល្បងផ្ទាល់ខ្លួនក្នុងរយៈពេលប៉ុន្មានខែថ្មីៗនេះ ហើយវាពិតជាធ្វើ ឱ្យស្ថានភាពរបស់ខ្ញុំប្រសើរឡើងក្នុងកម្រិតមួយ៖
១. កំណត់ទម្លាប់ពេលព្រឹក៖ បន្ទាប់ពីក្រោកពីដំណេកហើយ ផឹកទឹកមួយកែវ។ លាងមុខរបស់អ្នក។ ចំណាយពេលមួយម៉ោងសម្រាប់ការហាត់ប្រាណពេលព្រឹក ពីរដងទៅបីដងក្នុងមួយសប្តាហ៍ ប្រសិនបើអ្នកមានពេលនៅពេលព្រឹក។ វានឹងជួយឱ្យអ្នកចាប់ផ្តើមថ្ងៃរបស់អ្នកជាមួយអារម្មណ៍ស្រស់ស្រាយ បន្ទាប់ពីធ្វើការបែកញើស។ ហើយសម្រាប់ស្ត្រី អនាម័យ និងក្លិនមានសារៈសំខាន់ជាពិសេស។ លើសពីនេះ ញ៉ាំអាហារពេលព្រឹកដែលមានជីវជាតិមួយចំណែកល្មមនៅពេលវេលាដូចគ្នាជារៀងរាល់ថ្ងៃ។
២. សមតុល្យជីវិតការងារ៖ តុល្យភាពនៅទីនេះមានន័យថាអ្នកបំពេញការងារតាមកាលកំណត់នៅកន្លែងធ្វើការ ខណៈពេលដែលអ្នកក៏មានពេលវេលាផ្ទាល់ខ្លួនសម្រាប់ជីវិតរបស់អ្នក មនុស្សជាទីស្រលាញ់របស់អ្នក និងខ្លួនអ្នកផងដែរ។ អ្នកអាចរកប្រាក់បានច្រើនតាមរយៈការខិតខំប្រឹងប្រែងរបស់អ្នក ប៉ុន្តែសូមចាំថា ប្រាក់ខែរបស់អ្នកមិនអាចធានាបានថាអាយុវែង ឬសុភមង្គលឡើយ។ ដូច្នេះហើយ យើងត្រូវរៀនកំណត់អាទិភាពទំនួលខុសត្រូវរបស់យើង បន្ធូរភាពតានតឹងរបស់យើង និងគ្រប់គ្រងពេលវេលាសម្រាប់ការឱ្យរង្វាន់ខ្លួនឯង និងការស្រលាញ់ខ្លួនឯងផងដែរ។
៣. រក្សាជាតិទឹក៖ ទោះបីជាជាតិទឹកមានសារៈសំខាន់សម្រាប់សុខភាពក៏ដោយ ប៉ុន្តែការដឹងថាតើត្រូវផឹកទឹកប៉ុន្មានគឺជារឿងសំខាន់មួយទៀត។ យោងតាមទស្សនាវដ្តី Forbes Health វិទ្យាស្ថានវេជ្ជសាស្ត្រនៃវិទ្យាស្ថានជាតិផ្តល់ដំបូន្មានដល់ស្ត្រីពេញវ័យឱ្យទទួលទានទឹក ២,7 លីត្រជារៀងរាល់ថ្ងៃ ហើយបុរសពេញវ័យត្រូវទទួលទាន ៣,៧ លីត្រ។ ដូចគ្នានេះផងដែ រកុំរង់ចាំរហូតដល់អ្នកស្រេកទឹក។
៤. គេងឱ្យបានស្កប់ស្កល់៖ យោងតាម Healthline ស្ត្រីពេញវ័យត្រូវមានការគេងយ៉ាងហោចណាស់ ៧ទៅ៩ ម៉ោង ដើម្បីស្តារកោសិកាស្បែក និងមុខងារខួរក្បាលរបស់អ្នកឡើងវិញ។ អ្នកនឹងភ្ញាក់ពីដំណេកស្រស់ស្រាយ ពេលអ្នកទទួលបានការគេងលក់យ៉ាងមានគុណភាព។
អត្ថបទដោយ អ្នកគ្រូ ឃ្លីម ណាឡែន