សូមអ្នកសួរខ្លួនឯងនូវសំណួរទាំងនេះ៖
១) តើអ្នកបានធ្វើដំណើរកម្សាន្តជាមួយគ្រួសាររបស់អ្នកជាលើកចុងក្រោយនៅពេលណា?
២) តើដំណើរកម្សាន្តបន្ទាប់របស់អ្នកនៅពេលណា?
៣) តើអ្នកមានលំហាត់ប្រាណ និងអាហារទៀងទាត់ដែរឬទេ?
៤) តើអ្នកគេងបានគ្រប់គ្រាន់ទេ?
៥) តើអ្នកអាចឈប់ធ្វើការទាំងស្រុងនៅពេលអ្នកនៅផ្ទះបានទេ?
៦) តើអ្នកទទួលយកការអញ្ជើញពីមិត្តភ័ក្តិរបស់អ្នក ហើយចូលរួមសកម្មភាពសង្គមជាមួយពួកគេទេ?
ប្រសិនបើចម្លើយរបស់អ្នកភាគច្រើនគឺបាទ/ចាស នោះសូមអបអរសាទរ! អ្នកកំពុងរីករាយនឹងតុល្យភាពជីវិតការងារត្រឹមត្រូវ។ ប៉ុន្តែសម្រាប់មនុស្សជាច្រើន វាពិបាកក្នុងការធ្វើឱ្យមានតុល្យភាពរវាងការងារ និងសុខុមាលភាពនាពេលបច្ចុប្បន្ននេះ ជាពិសេសប្រសិនបើអ្នកកំពុងធ្វើការក្នុងមុខតំណែងគ្រប់គ្រង។ ហេតុអ្វីបានជាវាពិបាកម៉្លេះក្នុងការថែរក្សាសុខភាពរបស់អ្នកឱ្យបានត្រឹមត្រូវ ហើយទន្ទឹមនឹងការបំពេញទំនួលខុសត្រូវការងាររបស់អ្នក?
នៅពេលដែលយើងក្លាយទៅជាអ្នកគ្រប់គ្រង យើងមានទំនួលខុសត្រូវកាន់តែច្រើន និងម៉ោងធ្វើការកាន់តែយូរ។ ពេលវេលាផ្ទាល់ខ្លួនរបស់យើងកាន់តែតិច ខណៈដែលសហការីរបស់យើងតែងតែត្រូវការការសម្រេចចិត្តរបស់
យើង។ នេះមានន័យថា ទំនួលខុសត្រូវរបស់យើងមិនបញ្ចប់សូម្បីតែម៉ោងធ្វើការក៏ដោយ។ ការប្រើប្រាស់ថាមពលច្រើនហួសប្រមាណ (រាងកាយ និងផ្លូវចិត្ត) សម្រាប់ការងារ បណ្តាលឱ្យមានភាពតានតឹង ការខកចិត្ត អស់កម្លាំង និងផលិតភាពទាបក្នុងរយៈពេលខ្លី។ ក្នុងរយៈពេលវែង និយោជិតដែលខកខានមិនបានសម្រាកឱ្យបានត្រឹមត្រូវ និងថែទាំសុខុមាលភាពរបស់ពួកគេនឹងប្រឈមមុខនឹងបញ្ហាសុខភាពដែលបង្កគ្រោះថ្នាក់ដូចជា ជំងឺធ្លាក់ទឹកចិត្ត ជំងឺដាច់សរសៃឈាមខួរក្បាល ការឡើងទម្ងន់ និងការឈឺសាច់ដុំ។
ខាងក្រោមនេះគឺជាដំបូន្មានមួយចំនួន ដើម្បីពង្រឹងសុខភាព និងសុខុមាលភាពរបស់អ្នក ដោយមិនប៉ះពាល់ដល់គុណភាពការងាររបស់អ្នក៖
ក) រៀនផ្ទេរភារកិច្ច៖ បង្វឹកមិត្តរួមការងាររបស់អ្នកឱ្យបានល្អ ហើយរៀបចំភារកិច្ចឱ្យពួកគេ។ សូមចងចាំថា កុំធ្វើការតែម្នាក់ឯង នៅពេលដែលអ្នកមានក្រុមការងាររបស់អ្នកជួយអ្នក។
ខ) សម្រាកពេលធ្វើការ៖ កំហុសទូទៅមួយដែលយើងធ្វើគឺអង្គុយនៅកន្លែងមួយដើម្បីបញ្ចប់កិច្ចការទាំងអស់។ នេះមិនល្អចំពោះភ្នែក (ប្រសិនបើអ្នកធ្វើការនៅពីមុខអេក្រង់កំព្យូទ័រ) ហើយវាប៉ះពាល់ដល់សាច់ដុំរបស់អ្នក។ សំរាក ៥ នាទីបន្ទាប់ពីមើលអេក្រង់កំព្យូទ័រ ៤៥ នាទីដែល អនុញ្ញាតឱ្យភ្នែករបស់អ្នកសម្រាកបន្ទាប់ពីមើលអេក្រង់អស់រយៈពេលយូរ។ ដូចគ្នានេះផងដែរ អ្នកគួរតែដើរចេញពីតុរបស់អ្នក ដើម្បីមានចលនាខ្លះ។
គ) ផ្តល់ពត៌មានអោយអ្នកគ្រប់គ្រងរបស់អ្នកដឹង ប្រសិនបើអ្នកត្រូវការពន្យាពេលកំណត់ការងាររបស់អ្នក។ ការក្លាយជាអ្នកមានភាពល្អឥតខ្ចោះនឹងមិនអាចជួយអ្នកនៅពេលក្រោយបានទេ។ ទទួលយកការពិតថាមានថ្ងៃដែលអ្នកឈឺឬមានអារម្មណ៍មិនសប្បាយចិត្តខ្លាំង។ ប្រសិនបើមានអ្វីដែលរារាំងអ្នកពីការបំពេញកិច្ចការរបស់អ្នកទាន់ពេល សូមជូនដំណឹងដល់អ្នកគ្រប់គ្រងរបស់អ្នកជាមុន។
ឃ) ប្រើប្រាស់ការឈប់សម្រាកប្រចាំឆ្នាំរបស់អ្នកដោយឈ្លាសវៃ៖ រៀបចំពេលវេលាដើម្បីធ្វើដំណើរកម្សាន្តនិងរៀបចំផែនការទុកជាមុនឱ្យបានល្អ ដើម្បីឲ្យមិត្តរួមការងាររបស់អ្នកអាចគ្រប់គ្រងការងាររបស់អ្នកនៅពេលដែលអ្នកមិននៅក្បែរនោះ។
ង) មកដល់កន្លែងធ្វើការទាន់ពេលហើយចេញទាន់ពេលវេលា៖ អ្នកត្រូវយល់ថាម៉ោងធ្វើការយូរពេកនឹងធ្វើឱ្យគុណភាពការងាររបស់អ្នកធ្លាក់ចុះ។ ដូច្នេះហើយសូមចេញទៅផ្ទះបន្ទាប់ពីម៉ោងការងារដើម្បីសម្រាកឲ្យបានល្អ។
ច) កំណត់ពេលវេលាសម្រាប់ការហាត់ប្រាណ៖ មិនថាអ្នករវល់ ឬហត់នឿយប៉ុណ្ណានោះទេ អ្នកត្រូវការពេលវេលាសម្រាប់ការហាត់ប្រាណ។ វាជាវិធីល្អក្នុងការបញ្ចេញភាពតានតឹង និងពង្រឹងសុខភាពរបស់អ្នក។
ការងារគឺសំខាន់ ប៉ុន្តែសុខភាពរបស់អ្នកកាន់តែសំខាន់។សូមថែសុខភាពអោយបានល្អណា!
អត្ថបទដោយ៖ រតនា ទូច