បញ្ហាសុខភាពផ្លូវចិត្ត និងការយល់ដឹង

វាពិតជាមានសារៈសំខាន់ណាស់ ដែលមនុស្សម្នាក់ៗមានជីវិតដែលមាន សុខភាព ល្អទាំងផ្លូវកាយនិង ផ្លូវចិត្ត ។ អ្នកខ្លះប្រហែលជាគិតថា សុខភាពផ្លូវកាយ មានសារៈសំខាន់ជាងផ្លូវចិត្ត ឬក៏ ផ្ទុយមកវិញ។ ទោះបីជាយ៉ាងណាក៏ដោយ ទាំងសុខភាព​​ ផ្លូវកាយនិង​ផ្លូវចិត្ត គឺមានសារៈសំខាន់ស្មេីរៗគ្នា។ ក្នុងកាលៈទេសៈខ្លះ យើងប្រហែលជាមិនដឹងថា ខ្លួនឯងមានបញ្ហាសុខភាពផ្លូវចិត្តផង រហូតដល់ វាកាន់តែពិបាកទៅៗ។ មាន​សញ្ញា​គួរឲ្យ​កត់​សម្គាល់​មួយ​ចំនួន​ ដើម្បី​សង្កេត​មើល​ ស្ថានភាព​សុខភាព​ផ្លូវចិត្ត​របស់​អ្នក ​ថា ​តើ​អ្នក​មាន​បញ្ហាសុខភាព​ផ្លូវចិត្ត​ឬ​អត់។

ជាដំបូង វាបង្ហាញនៅក្នុងការផ្លាស់ប្តូររបបអាហាររបស់អ្នក។ អ្នកប្រហែលជាធ្លាប់មានរបបអាហារដូចធម្មតា ពេញមួយជីវិតរបស់អ្នក ហើយមិនដឹង ថា ហេតុអ្វីបានជាទម្លាប់នៃការញ៉ាំរបស់អ្នកផ្លាស់ប្តូរបែបនេះទេ។ ឧទាហរណ៍ អ្នកចាប់ផ្តើមបាត់បង់ចំណង់អាហារ ឬក៏ ញ៉ាំអាហារច្រើនពេក ជាងធម្មតា។ វាប្រហែលជាកើតឡើងនៅពេលដែលអ្នកមានអារម្មណ៍តានតឹង ឬ បាក់ទឹកចិត្ត។ ដូច្នេះហើយ អ្នក​នឹង​មានការ​ស្រក ឬ​ ឡើង​ទម្ងន់​ដោយ​មិនបាន​រំពឹងទុក​។ ដូច្នេះ វាគឺមកបញ្ហាសុខភាពផ្លូវចិត្តដែរ។ ប្រសិនបើអ្នកជួបប្រទះបទពិសោធន៍បែបនេះ អ្នកប្រហែលជាត្រូវស្វែងរកការជួយពីនរណាម្នាក់ ដែលអាចឲ្យអ្នកទុកចិត្តបាន​ នៅពេលដែលអ្នកស្វែងរកការជួយ។

ទីពីរ ប្រសិនបើអ្នកមានបញ្ហាសុខភាពផ្លូវចិត្ត អ្នកក៏អាចជួបប្រទះនឹង ការផ្លាស់ប្តូរទម្លាប់នៃការគេងរបស់អ្នក។ ឧទាហរណ៍ អ្នកធ្លាប់គេងទៀងទាត់ និងគ្រប់គ្រាន់ ប៉ុន្តែបន្ទាប់ក្រោយមក អ្នកបែរជាគេងមិនគ្រប់គ្រាន់ ឬ គេងច្រើនពេក ជាងធម្មតា។ មនុស្សមួយចំនួនខ្លះទៀត បន្តគិតអំពីបញ្ហាដែលពួកគេកំពុងជួបប្រទះ ដូចនេះហេីយ គាត់មានការពិបាកក្នុងការឲ្យគាត់គេងលក់ នៅពេលក្រោយ បន្ទាប់នោះ។ អ្នកខ្លះទៀត មានអារម្មណ៍ហត់នឿយពេលគិតច្រើន ដូច្នេះហើយ គាត់សម្រេចចិត្តគេងយូរជាងធម្មតា។ វា​ជា​រោគ​សញ្ញា​មួយ​ទៀត​ ដែល​អ្នកមានបញ្ហាផ្លូវចិត្ត​​។

ចំនុចចុងក្រោយគឺ នៅពេលដែលបញ្ហាផ្លូវចិត្តរបស់អ្នកកាន់តែធ្ងន់ធ្ងរ វាកាន់តែគួរឱ្យកត់សម្គាល់ខ្លាំងឡេីង។ អ្នកធ្លាប់តែសប្បាយរីករាយ និង មានទំនាក់ទំនងជាមួយមនុស្សជុំវិញខ្លួន ប៉ុន្តែបន្ទាប់ក្រោយមក បន្តិចម្តងៗអ្នកបែរជា ចង់នៅតែម្នាក់ឯងទៅវិញ​ នៅទីកន្លែងស្ងាត់ ហើយចង់គេច និយាយទំនាក់ទំនង ជាមួយមនុស្សម្នា។ ការគម្លាត​​ខ្លួន​ឯង ហើយ​មិន​ចែក​រំលែក​ដល់​អ្នក​ណា​ម្នាក់​ អំពី​អ្វី​ដែល​អ្នក​កំពុង​ជួបប្រទះ​នោះ​ គឺ​ជា​កម្រិត​គ្រោះថ្នាក់ហេីយ។ នៅពេលដែលអ្នកមានអារម្មណ៍ទាំងអស់នោះ អ្នកត្រូវតែចែករំលែកវា ជាមួយនរណាម្នាក់ដែលអ្នកអាចនឹងពឹងពាក់បាន។

សង្ខេបរួមចំណុចទាំងអស់ខាងលើ យើងទាំងអស់គ្នាគួរតែស្វែងយល់ ដឹងអំពីស្ថានភាពនៃបញ្ហាផ្លូវចិត្តទាំងអស់នោះ ពីព្រោះ ផលវិបាករបស់វា អាចធ្វើឲ្យប៉ះពាល់ដល់អាយុជីវិតមនុស្ស ជាច្រើន នៅទូទាំងពិភពលោក នាពេលបច្ចុប្បន្ននេះ។ អ្នកខ្លះ អាចកត់សម្គាល់ និងយកឈ្នះលើ បញ្ហាទាំងអស់នោះបានយ៉ាងងាយស្រួល និងដោយមានសុវត្ថិភាព ប៉ុន្តែអ្នកផ្សេងទៀត ប្រហែលជាមិនដឹងថា បញ្ហាសុខភាពផ្លូវចិត្ត អាចមានផលប៉ះពាល់អ្វីនោះទេ រហូតដល់វាកើតឡើងចំពោះខ្លួនឯង។

ដោយ ពេញ ស្រីលក្ខណ៏