ពិធីបុណ្យផ្កាយប្រារព្ធឡើងដើម្បីរំលឹកដល់រឿងរ៉ាវស្នេហារបស់គូស្នេហ៍ពីរនាក់។ គូស្នេហ៍ទាំងពីរ ត្រូវបានគេតំណាងដោយផ្កាយ Vega និង Altair ហើយត្រូវបានគេអនុញ្ញាតឱ្យជួបគ្នាតែមួយដងក្នុងមួយឆ្នាំ។ ពិធីបុណ្យនេះប្រារព្ធឡើងនៅថ្ងៃទី ៧ ខែ កក្កដា។
ប្រជាជនសរសេរពាក្យជូនពររបស់ពួកគេនៅលើក្រដាសពណ៌តូចមួយដែលហៅថា tanzaku ហើយព្យួរវានៅលើដើមឫស្សី។ នៅថ្ងៃបន្ទាប់ ដើមឫស្សី ត្រូវបានគេបណ្តែតលើទន្លេ ហើយដុតជាតង្វាយ។ ក្រៅពីធ្វើការជូនពរ មនុស្សក្នុងប្រទេសជប៉ុនប្រារព្ធពិធីបុណ្យនេះជាមួយនឹងការតុបតែងចម្រុះពណ៌ កាំជ្រួច ក្បួនដង្ហែ និងមានតូបលក់អាហារផងដែរ។
រឿងព្រេងបុណ្យផ្កាយនេះកើតចេញពីរឿងព្រេងចិនមួយឈ្មោះថា Qixi ដែលជារឿងរបស់គូស្នេហ៍ពីរនាក់។ មួយគឺព្រះនាង Orihime នៅស្ថានសួគ៌ និងមួយទៀតជាបុរសគង្វាលគោ។ ពួកគេបានជួបគ្នាហើយក៏លង់ស្រលាញ់គ្នា បន្ទប់មកក៏បានរៀបការ។ ដោយសារសេចក្តីស្រឡាញ់ដល់ជ្រារជ្រៅធ្វើឱ្យ Orihime ឈប់ត្បាញ ហើយ Hikoboshi បានអនុញ្ញាតឱ្យគោរបស់គាត់ដើរផ្ដេសផ្ដាស់នៅលើមេឃ។
បិតារបស់ព្រះនាង Orihime ខឹងណាស់ពេលបានដឹងថា ពួកគេទាំងពីរភ្លេចពីតួនាទីរបស់ខ្លួន ហើយហាមមិនឱ្យគូស្នេហ៍ទាំងពីរនៅជាមួយគ្នាទៀត។ ទោះជាយ៉ាងណាក៏ដោយ ដោយសារតែការអង្វររបស់កូនស្រី និងការស្រលាញ់របស់គាត់ចំពោះនាង ឪពុកព្រះនាងក៏សំរេចឱ្យគូស្នេហ៍ឆ្លងភពទាំងពីរអាចជួបគ្នាបានមួយដងក្នុងមួយឆ្នាំនៅថ្ងៃទី ៧ ខែទី ៧។
សរសេរដោយៈ អូវែន សុខស្រីឡា