វិធីសាស្រ្តត្រឹមត្រូវក្នុងការប្រៀនប្រដៅកូនរបស់អ្នក

រៀបរៀងដោយ លោក ពុំ គឹមហាក់ ​

កុមារកើតមកដូចជាក្រដាស ស បើអ្នកអប់រំគេឲ្យបានត្រឹមត្រូវ នោះគេនឹងធំឡើងជាពលរដ្ឋល្អ។ ខាងក្រោមនេះគឺជាវិធីមួយចំនួនសម្រាប់ការអប់រំកុមារ ។

1. ចូរនិយាយណែនាំដោយមិនស្តីបន្ទោស

ទូរន្មានកូនរបស់អ្នកនូវអ្វីដែលត្រូវ និងអ្វីដែលខុស ហើយត្រូវធ្វើជាគំរូដល់គេ។ បើអ្នកប្រាប់កូនកុំឱ្យនិយាយពាក្យអសុរោះ ចូរអ្នកក៏មិនត្រូវនិយាយវាដែរ។

2. ទូរន្មានកូនដោយស្ងាត់ៗ

ព្យាយាមកុំបំបាក់មុខកូននៅចំពោះមុខមិត្តភក្តិ ឬអ្នកដទៃ។ កូនរបស់អ្នកមិនថាអាយុច្រើន ឬតិចសុទ្ធតែមានកិត្តិយសរបស់គេ។

3. កំណត់ច្បាប់ទម្លាប់សម្រាប់កូន

កំណត់ច្បាប់ទម្លាប់ឱ្យបានច្បាស់លាស់ដែលកូនរបស់អ្នកត្រូវធ្វើ ប៉ុន្តែត្រូវពន្យល់គេអំពីមូលហេតុដែលច្បាប់នេះត្រូវបានកំណត់ឡើង។

4. ផលវិបាកនៃការមិនគោរពតាមច្បាប់ទម្លាប់ដែលបានកំណត់

ប្រសិនបើកូនមិនគោរពតាមច្បាប់ទម្លាប់ដែលបានកំណត់ ការពិន័យមួយចំនួននឹងត្រូវបានអនុវត្ត ដូចដែលកូនរបស់អ្នកបានយល់ព្រមជាមូយអ្នករួចមកហើយ។ ឧទាហរណ៍៖ ប្រសិនបើកូនរបស់អ្នកប្រើទូរស័ព្ទយូរជាងពេលវេលាកំណត់ នោះគេនឹងមិនអាចលេងទូរស័ព្ទបានទេនៅថ្ងៃបន្ទាប់។

5. ផ្តោតលើអាកប្បកិរិយាល្អ

នៅពេលកូនរបស់អ្នកមានអាកប្បកិរិយាល្អ ចូរសរសើរគាត់ជាការលើកទឹកចិត្ត ។ ឧទាហរណ៍៖ អូ! ថ្ងៃនេះកូនរៀបចំខ្លួនទៅសាលារៀនបានទាន់ម៉ោងល្អណាស់ ដារ៉ា!