ហេតុអ្វីសិស្សគួរចូលរួមសកម្មភាពស្ម័គ្រចិត្ត?

ការងារស្ម័គ្រចិត្តជាសកម្មភាពមួយដែលធ្វើអោយយុវជនអាចស្វែងរកខ្លួនឯង និងស្វែងរកអ្វីដែលគេចូលចិត្តតាមរយៈការអនុវត្តសកម្មភាពជាក់ស្តែង។ ការងារស្ម័គ្រចិត្តជាការងារមួយដែលមិនបានប្រាក់កម្រៃអ្វីនោះឡើយ ក៏ប៉ុន្តែវាមានតម្លៃលើសពីប្រាក់កាស ដោយសារតែវាអាចធ្វើអោយសិស្សអាចអភិវឌ្ឍសមត្ថភាពរបស់ខ្លួន។  តាមរយៈការចូលរួមការងារស្ម័គ្រចិត្ត សិស្សអាចទទួលបានឱកាសជាច្រើននាពេលអនាគត។ មូលហេតុចម្បងទាំង ៤ ដែលសិស្សគួរតែចូលរួមការងារស្ម័គ្រចិត្តនឹងត្រូវបកស្រាយនៅខាងក្រោមនេះ៖ 

១. ការងារស្ម័គ្រចិត្តជួយអោយសិស្សអាចរៀនអ្វីដែលថ្មី ដែលគេមិនដែលបានស្គាល់ពីមុនមក និងធ្វើអោយគេចាប់ផ្តើមដឹងថាខ្លួនឯងស្រលាញ់ចូលចិត្តអ្វីអោយប្រាកដ

នៅក្នុងការងារស្ម័គ្រចិត្តនីមួយៗមានមុខងារជាច្រើនដែលសិស្សអាចជ្រើសរើសដាក់ពាក្យបាន។ សិស្សនឹងអាចរៀនអ្វីដែលថ្មីជានិច្ចពីមុខងារមួយទៅមុខងារមួយទៀតដែលគេបានដាក់។ ប្រសិនបើសិស្សផ្តោតទៅលើការសិក្សានៅក្នុងថ្នាក់រៀនតែមួយមុខ នោះអ្វីដែលគេទទួលបានគឺបានត្រឹមតែដឹងខ្លឹមសារមេរៀននីមួយៗ និងធ្វើកិច្ចការដែលគ្រូបានដាក់អោយតែប៉ុណ្ណោះ ។ ផ្ទុយទៅវិញ ប្រសិនបើសិស្សប្រឡូកក្នុងការងារស្ម័គ្រចិត្ត នោះសិស្សនឹងអាចទទួលបានបទពិសោធន៍ថ្មីដែលមិនធ្លាប់បានរៀននៅក្នុងសាលាពីមុនមក។

២. ការងារស្ម័គ្រចិត្តជួយអោយសិស្សអាចធ្វើការទំនាក់ទំនងជាមួយនឹងមនុស្សថ្មីៗ និងមនុស្សដែលមានសក្តានុពលនៅក្នុងសង្គម

នៅក្នុងការងារស្ម័គ្រចិត្ត សិស្សអាចធ្វើការទំនាក់ទំនងជាមួយនឹងមនុស្សថ្មីៗដែលពួកគេមិនដែលស្គាល់ពីមុនមក ដូចជាអ្នករៀបចំកម្មវិធី អ្នកធ្វើការស្ម័គ្រចិត្តជាមួយគ្នា និងភ្នាក់ងារដែលពាក់ព័ន្ធផ្សេងៗ។ តាមរយៈការទំនាក់ទំនងជាមួយនឹងមនុស្សថ្មីៗបែបនេះ វានឹងធ្វើអោយសិស្សអាចពង្រឹងសមត្ថភាពនៅក្នុងការទំនាក់ទំនងជាមួយនឹងមនុស្សជុំវិញខ្លួន រួមទាំងជាទ្វារនៃឱកាសដែលបើកសម្រាប់ពួកគេអោយទទួលបានឱកាសជាច្រើននាពេលអនាគតតាមរយៈទំនាក់ទំនងទាំងនោះ។ បន្ថែមពីនេះទៅទៀត គេនឹងអាចទទួលបានការចែករំលែកបទពិសោធន៍ថ្មីៗពីអ្នកដែលគេបានស្គាល់ថ្មីៗផងដែរ។

៣. ការងារស្ម័គ្រចិត្តជួយអោយសិស្សអាចចូលរួមចំណែកទៅកាន់សង្គមអោយកាន់តែប្រសើរឡើង

  យុវជនភាគច្រើនតែងតែមានបំណងក្នុងការចូលរួមចំណែកជួយសង្គម ក៏ប៉ុន្តែមិនដឹងថាចាប់ផ្តើមពីចំណុចណាទៅមុន។ ជាការពិតណាស់ ការងារស្ម័គ្រចិត្តជាស្ពានសម្រាប់សិស្សអាចចាប់ផ្តើមចូលរួមជួយសង្គម។ មិនចាំបាច់ទាល់តែយើងមានទ្រព្យសម្បត្តិច្រើនទើបអាចជួយសង្គមបានទេ  ពីព្រោះថាយុវជនអាចប្រើសមត្ថភាពរបស់ខ្លួនក្នុងការកសាងសហគមន៍មួយដែលមានភាពប្រសើរឡើងតាមរយៈសកម្មភាពស្ម័គ្រចិត្តផ្សេងៗដូចជា ការចូលរួមគម្រោងសប្បុរសធម៌ គម្រោងទាក់ទងនឹងបរិស្ថាន គម្រោងទាក់ទងនឹងការអប់រំ និងគម្រោងផ្សេងៗទៀតជាច្រើន។

  ៤. ការងារស្ម័គ្រចិត្តជួយសិស្សអភិវឌ្ឍជំនាញរឹង និងជំនាញទន់

 

នៅពេលដែលសិស្សចូលរួមក្នុងការងារស្ម័គ្រចិត្ត ពួកគេនឹងអាចរៀនបានច្រើនពីការងារផ្សេងៗតាមរយៈការអនុវត្តផ្ទាល់ជាក់ស្តែង។ ដើម្បីអាចបំពេញតួនាទីបានល្អក្នុងមុខងារដែលពួកគេបានដាក់ ដោយសារតែមេក្រុមរបស់គេនឹងធ្វើការណែនាំពីរបៀបនៅក្នុងការបំពេញតួនាទីទាំងនោះ។ ឧទាហរណ៍៖ ប្រសិនបើសិស្សម្នាក់បានដាក់ពាក្យផ្នែកសម្របសម្រួលវាគ្មិន ក៏ប៉ុន្តែសិស្សម្នាក់នោះមិនធ្លាប់មានបទពិសោធន៍ក្នុងការទំនាក់ទំនងបែបផ្លូវការពីមុនមកនោះទេ ដូចនេះ មេក្រុមនឹងធ្វើការបង្រៀនណែនាំពីរបៀបនៅក្នុងការទំនាក់ទំនងបែបផ្លូវការជាមុនសិន រួមទាំងទុកពេលសម្រាប់សិស្សនោះបានហាត់សមអោយមានភាពក្លាហានជាមុនសិន ទើបសិស្សម្នាក់នោះចាប់ផ្តើមធ្វើការទាក់ទងជាមួយនឹងវាគ្មិន ដែលធ្វើអោយសិស្សស្ម័គ្រចិត្តបានរៀនអ្វីដែលថ្មីជាច្រើនពីមួយថ្ងៃទៅមួយថ្ងៃ។

 

ក្នុងរយៈពេល ៥ ឆ្នាំដែលខ្ញុំបានប្រឡូកនៅក្នុងការងារស្ម័គ្រចិត្តមកនេះ ធ្វើអោយខ្ញុំបានកត់សម្គាល់ថាការងារស្ម័គ្រចិត្តបានជួយអោយខ្ញុំអភិវឌ្ឍសមត្ថភាពកាន់តែប្រសើរឡើងពីមួយឆ្នាំទៅមួយឆ្នាំ។ ការងារស្ម័គ្រចិត្តធ្វើអោយខ្ញុំមានក្តីស្រមៃកាន់តែធំ និងមើលឃើញពីអនាគតវែងឆ្ងាយ។ បើសិនជាអាចបង្វិលពេលវេលាបាន ខ្ញុំពិតជាចង់ស្គាល់ការងារស្ម័គ្រចិត្តអោយបានលឿនជាងនេះ ដើម្បីអាចចូលរួមបានច្រើននិងជួយសង្គមអោយកាន់តែប្រសើរឡើង។

ខ្ញុំសង្ឃឹមថាអត្ថបទមួយនេះនឹងអាចជួយសិស្សបានស្វែងយល់កាន់តែស៊ីជម្រៅពីការងារស្ម័គ្រចិត្ត និងចាប់ផ្តើមចំណាយពេលវេលាក្នុងការចូលរួមការស្ម័គ្រចិត្តផងដែរ។ ទោះបីជាពេលនេះ ខ្ញុំមិនសូវមានពេលអាចចូលរួមដោយផ្ទាល់ក្នុងការងារស្ម័គ្រចិត្តដូចពីមុនក៏ពិតមែន ក៏ខ្ញុំនៅតែចូលចិត្តនិយាយពីអត្ថប្រយោជន៍នៃការងារស្ម័គ្រចិត្តទៅកាន់សិស្សខ្ញុំជានិច្ច ដើម្បីអោយពួកគេបានចូលរួមក្នុងការជួយសង្គម និងអភិវឌ្ឍសមត្ថភាពរបស់ខ្លួនតាមរយៈសកម្មភាពមួយនេះ។

 

ដោយ:  គ្រី លីតា