អ្នកគ្រូ ចាំ រតនា មានតួនាទីជាប្រធានគ្រូនៅមជ្ឈមណ្ឌលភាសា អេ អាយ អាយ នាពេលបច្ចុប្បន្ននេះ។
បើនិយាយពីប្រវត្តិនៃការសិក្សារបស់អ្នកគ្រូវិញ គាត់បានបញ្ចប់ការសិក្សាថ្នាក់អនុបណ្ឌិត ឯកទេសអប់រំភាសាអង់គ្លេស នៅឆ្នាំ២០១៨។នៅពេលដែលគាត់រៀននៅសាកលវិទ្យាល័យ អ្នកគ្រូគឺជាសិស្សឆ្នើមម្នាក់នៅក្នុងថ្នាក់។គាត់មានភាពរួសរាយរាក់ទាក់ និងជួយយកអាសាមិត្តរួមថ្នាក់ផងដែរ។ហេតុនេះហើយទើបគាត់តែងតែជួយជ្រោមជ្រែងមិត្តរួមថ្នាក់ដែលបានជួបប្រទះនឹងឧបសគ្គក្នុងការសិក្សានានាតាមដែលគាត់អាចធ្វើបានផងដែរ។នេះជាមូលហេតុដែលធ្វើឱ្យគាត់មានទំនាក់ទំនងល្អជាមួយមិត្តរួមថ្នាក់គ្រប់ៗគ្នា។
អ្នកគ្រូ រតនា បានបំពេញតួនាទីជាគ្រូបង្រៀនភាសាអង់គ្លេសពេញម៉ោង នៅមជ្ឈមណ្ឌលភាសា អេ អាយ អាយ នៅថ្ងៃទី២៦ ខែកុម្ភៈ ឆ្នាំ២០១៨។ជាមួយនឹងបទពិសោធន៍នៃការបង្រៀនរយៈបីឆ្នាំកន្លងមកនេះអ្នកគ្រូបានបង្រៀនសិស្សសឹងតែគ្រប់កម្រិតទាំងអស់ រួមទាំងប្រភេទសិស្សខុសៗគ្នា។លើសពីនេះទៅទៀតគាត់ក៏បានប្រើប្រាស់វិធីសាស្រ្ត និងបច្ចេកទេសបង្រៀនផ្សេងៗគ្នា ដើម្បីបង្កើតបរិយាកាសរីករាយនៅក្នុងថ្នាក់រៀនសម្រាប់សិស្សរបស់គាត់ផងដែរ។ដោយសារតែការបង្រៀនដែលប្រកបដោយវិជ្ជាជីវៈរបស់អ្នកគ្រូ គាត់ក៏បានក្លាយទៅជាគ្រូម្នាក់ដែលឆ្នើមនៅចុងឆ្នាំ២០២១។បន្ទាប់ពីបានបំពេញតួនាទីជាគ្រូបង្រៀនអស់រយៈពេលមួយឆ្នាំ អ្នកគ្រូត្រូវបានអញ្ជើញឱ្យចូលរួមបំពេញការងារនៅក្នុងក្រុមថ្នាក់ដឹកនាំនៃមជ្ឈមណ្ឌលភាសា អេ អាយ អាយ ក្នុងឆ្នាំ២០១៩ តែវាមិនទាន់ជាពេលវេលាដែលស័ក្តិសមសម្រាប់អ្នកគ្រូ គាត់ក៏បានបដិសេធសំណើនេះ។ក្រោយមកទៀតដោយសារតែការខិតខំប្រឹងប្រែង ការប្តេជ្ញាចិត្ត និងការចូលរួមរាល់សកម្មភាពរបស់សាលាយ៉ាងសកម្ម គាត់ក៏ត្រូវបានផ្តល់ឱកាសដើម្បីចូលរួមក្នុងក្រុមថ្នាក់ដឹកនាំម្តងទៀត ជាពិសេសគាត់ត្រូវបានតម្លើងតួនាទីជាប្រធានគ្រូនៅមជ្ឈមណ្ឌលភាសា អេ អាយ អាយ សាខាម៉ៅសេទុង នៅថ្ងៃទី០១ ខែវិច្ឆិកា ឆ្នាំ២០២១។
អ្នកគ្រូជឿជាក់ថា រាល់កុមារទាំងអស់ស័ក្តិសមនឹងទទួលជ័យលាភី តែតម្រូវឱ្យលោកគ្រូ អ្នកគ្រូកុំបោះបង់ពួកគាត់ និងយល់ពីតម្លៃនៃការផ្សារភ្ជាប់ទំនាក់ទំនង ព្រមទាំងព្យាយាមជំរុញឱ្យពួកគាត់ក្លាយទៅជាអ្នកដែលល្អបំផុតដែលពួកគាត់អាចធ្វើទៅបាន។