ភ្នំពេញ ថ្ងៃទី២០ ខែមេសា ឆ្នាំ២០២៤៖ មជ្ឈមណ្ឌលភាសា អេ អាយ អាយ (Aii) បានរៀបចំកម្មវិធីតម្រង់ទិសសម្រាប់លោកគ្រូ អ្នកគ្រូថ្មីសម្រាប់វគ្គសិក្សាថ្មីទី៨៣ ជាមួយនឹងការប្រគល់វិញ្ញាបនបត្រគ្រូឆ្នើមលើកទី៦ ជូនជាកិត្តិយសដល់លោកគ្រូ អ្នកគ្រូដែលបានបំពេញកាតព្វកិច្ចក្នុងការផ្តល់ការអប់រំប្រកបដោយគុណភាពកាលពីវគ្គសិក្សាកន្លងទៅ។
កម្មវិធីនេះប្រារព្ធឡើងដើម្បីផ្សព្វផ្សាយ និងជំរុញការប្តេជ្ញាចិត្តរបស់ Aii ជូនដល់លោកគ្រូ អ្នកគ្រូថ្មីក្នុងការផ្តល់នូវការអប់រំប្រកបដោយគុណភាពជូនដល់អនាគតអ្នកដឹកនាំរបស់កម្ពុជា។
អ្នកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិនៃក្រុមហ៊ុន ម៉េងលី ជេ. គួច អេឌ្យូខេសិន បានសង្កត់ធ្ងន់លើតួនាទីរបស់អ្នកអប់រំ និងការចូលរួមចំណែកដល់ភាពជោគជ័យរបស់សិស្សានុសិស្ស។ លោកក៏បានលើកទឹកចិត្តដល់លោកគ្រូ អ្នកគ្រូ និងសិស្សានុសិស្សក្នុងសកម្មភាពសប្បុរសរបស់ Aii ដើម្បីបង្កើនបទពិសោធសិក្សា និងការយល់ឃើញទៅពិភពលោក។
នៅចុងបញ្ចប់នៃកម្មវិធីតម្រង់ទិសនេះ ក៏មានពិធីប្រគល់វិញ្ញាបនបត្រដល់លោកគ្រូ អ្នកគ្រូឆ្នើមទាំង២៦រូប ដែលមកពីបណ្តាសាខារបស់ Aii ក្នុងរាជធានីភ្នំពេញ សៀមរាប និងតាកែវ។
Aii កំពុងធ្វើដំណើរនៅលើ «វិថីឆ្ពោះទៅកាន់ ២ទសវត្សរ៍(Road to 2 Decades)» របស់ខ្លួន ក្នុងការផ្តល់ការអប់រំប្រកបដោយគុណភាព និងការលើកទឹកចិត្តដល់សិស្សានុសិស្ស លោកគ្រូ និងអ្នកគ្រូសម្រាប់ការអប់រំនៅសតវត្សរ៍ទី២១។ Aii នឹងពង្រីកអគារសិក្សារបស់ខ្លួននៅសាខាជ្រោយចង្វារ បន្ទាប់ពីចាប់ផ្តើមដំណើរក្រោមប្រាំឆ្នាំ ដើម្បីបំពេញតម្រូវការថ្នាក់រៀនដោយសារតែមានកំណើនចំនួនសិស្សានុសិស្ស និងដើម្បីពង្រីកសហគមន៍សិក្សារបស់ខ្លួន។
អ្នកឧកញ៉ា វេជ្ជបណ្ឌិត គួច ម៉េងលី នឹងសម្ពោធការបោះពុម្ពស្នាដៃសៀវភៅថ្មីៗដូចជា៖ មាគ៌ាបញ្ញវន្ដ ការរៀបរាប់ពីបទពិសោធរបស់លោកក្នុងជំនួបជាមួយសម្តេចប៉ាបហ្វ្រង់ស័រនៅទីក្រុងវ៉ាទីកង់ និងការអប់រំសុខភាពផ្លូវចិត្ត។
Aii គឺជាគ្រឹះស្ថានអប់រំឈានមុខគេមួយនៅប្រទេសកម្ពុជា ដែលផ្តល់ជូននូវកម្មវិធី និងវគ្គសិក្សាយ៉ាងសម្បូរបែបលើជំនាញភាសាអង់គ្លេស ចិន និងថៃ។ ដោយមានការប្តេជ្ញាចិត្តយ៉ាងមុតមាំលើការផ្តល់ការអប់រំប្រកបដោយគុណភាព និងភាពជោគជ័យរបស់សិស្សានុសិស្ស Aii ទទួលបានកេរ្តិ៍ឈ្មោះ និងទំនុកចិត្តក្នុងការផ្តល់ការអប់រំលើជំនាញភាសា៕
