ក្រុមហ៊ុន ម៉េងលី ជេ. គួច អេឌ្យូខេសិន បន្តបង្កើនភាពចម្រុះនៅកន្លែងធ្វើការ តាមរយៈការរៀបចំវេទិកាសាធារណៈ

ភ្នំពេញ ថ្ងៃទី០២ ខែមីនា ឆ្នាំ២០២៤៖ មជ្ឈមណ្ឌលភាសា អេ​ អាយ អាយ (Aii) ដែលជាបុត្រ​សម្ព័ន្ធរបស់ក្រុមហ៊ុន ម៉េងលី ជេ. គួច អេឌ្យូខេសិន (MJQE) សហការជាមួយ សាលារៀន អន្តរទ្វីប អាមេរិកាំង (AIS) បានរៀបចំវេទិកាសាធារណៈលើកទីមួយរបស់ខ្លួនក្រោមប្រធានបទ «ជើងឯកនៃភាពចម្រុះនៅកន្លែងធ្វើការ» នៅរោងភាពយន្ត Prime Cineplex សាខា Samai Square ដើម្បីអបអរទិវាសិទ្ធិនារីអន្តរជាតិ ឆ្នាំ២០២៤។

ក្រសួងកិច្ចការនារី បានកំណត់យកមូលបទ «ស្ត្រី និងក្មេងស្រី ក្នុងបរិវត្តកម្មឌីជីថល»​ ឬ «Women and Girls in Digital Transformation» យុទ្ធនាការទិវាអន្តរជាតិនារី ៨មីនា ២០២៤ ដោយបានបង្ហាញឱ្យឃើញពីតួនាទីសំខាន់របស់ស្ត្រីក្នុងការជំរុញវឌ្ឍនភាពឌីជីថល និងការច្នៃប្រឌិត។ ហើយនេះមិនត្រឹមតែជាវេទិកាសម្រាប់ការចែករំលែកបទពិសោធន៍ និងពិភាក្សាប៉ុណ្ណោះទេ ប៉ុន្តែវាក៏ជាសញ្ញានៃការផ្លាស់ប្តូរផងដែរ ដែលជាការប្តេជ្ញា​របស់​ MJQE។

កម្មវិធីនេះមានការចែករំលែកពីវាគ្មិនកិត្តិយសដូចជា៖

១. សាស្ត្រាចារ្យបណ្ឌិត បូ ច័ន្ទគុលិកា ប្រធាននាយកដ្ឋានគោលនយោបាយនៃ ក្រសួងអប់រំ យុវជន និងកីឡា។

២. លោកស្រី តិច ស៊ីមហ៊ាង​ ស្ថាបនិក ក្រុមហ៊ុន KM Textiles Company Limited និង Keimeas Handicrafts។

៣. កញ្ញា កែវ គូនីឡា ដៃគូគ្រប់គ្រងនៃ​ ក្រុមហ៊ុន Mekhala Radiant Communications និងត្រូវបានចុះក្នុង 30 under 30 នៅក្នុងស្ថាប័ន Forbes នៅឆ្នាំ២០១៧។

៤. អ្នកស្រី នុត ក្លារ៉ា នាយិកាប្រតិបត្តិ ក្រុមហ៊ុនអប្សរាមេឌាសឺវីស (AMS)។

អ្នកដឹកនាំដ៏មានឥទ្ធិពលទាំងនេះបានចែករំលែកការយល់ដឹង បទពិសោធន៍ ឧបសគ្គ និងជ័យជំនះរៀងៗខ្លួន ដែលបានបង្ហាញយ៉ាងពិតប្រាកដអំពីតួនាទីដ៏សំខាន់របស់ស្ត្រីក្នុងភាពជាអ្នកដឹកនាំ និងបរិវត្តកម្មឌីជីថល។

នៅពេលផ្តល់មតិស្វាគមន៍ អ្នកឧកញ៉ា វេជ្ជបណ្ឌិត គួច ម៉េងលី បានសង្កត់ធ្ងន់លើសារៈសំខាន់នៃស្ត្រីនៅក្នុងតួនាទីជាអ្នកដឹកនាំនៅក្នុងក្រុមហ៊ុន។ «យើងកំណត់ក្រុមហ៊ុនរបស់យើងថា ជាក្រុមហ៊ុនគំរូក្នុងការផ្តល់សិទ្ធិអំណាចដល់ស្ត្រី ហើយយើងមានបុគ្គលិកនៅថ្នាក់ជាន់ខ្ពស់កាន់តែច្រើនឡើងដែលជាស្ត្រី។ ពួកគេគឺជាឆ្អឹងខ្នងរបស់ក្រុមហ៊ុនរបស់យើង ហើយពួកគេផ្តល់ទស្សនវិស័យចម្រុះនៅក្នុងការសម្រេចចិត្តរបស់យើង»។ អ្នកឧកញ៉ាក៏បានផ្ញើរសារដ៏មានអត្ថន័យ និងក្តីសង្ឃឹមដោយបង្ហាញយ៉ាងច្បាស់ពីការប្តេជ្ញាចិត្តរបស់ក្រុមចំពោះភាពចម្រុះ និងបរិយាបន្ននៅគ្រប់កម្រិតនៃស្ថាប័ននីមួយៗ។

សាស្ត្រាចារ្យបណ្ឌិត បូ ច័ន្ទគុលិកា បានមានប្រសាសន៍នៅក្នុងវគ្គចែករំលែកថា៖ «ជើងឯកនៃភាពចម្រុះនៅកន្លែងធ្វើការ គឺដំណើរឈានទៅដល់ការទទួលស្គាល់ និងការផ្តល់សក្តានុពល់ដល់ស្ត្រីក្នុងការចូលកាន់កាប់តួនាទីជាអ្នកដឹកនាំនៅក្នុងស្ថាប័ន»។ គាត់ក៏​បាន​លើកទឹកចិត្តដល់ស្ត្រី និងអ្នកជំនាន់ក្រោយទាំងអស់ឱ្យប្រឹងប្រែងក្នុងការសិក្សាឱ្យដល់ថ្នាក់ឧត្តមសិក្សា និង​ដើរតាមក្តីស្រមៃរបស់ខ្លួន។

វេទិកាសាធារណៈនេះ​ បានឆ្លុះបញ្ចាំងយ៉ាងច្បាស់ថា ក្រុមហ៊ុន ម៉េងលី ជេ. គួច អេឌ្យូខេសិន (MJQE) ឈានមុខគេក្នុងការបង្កើតបរិយាកាសដែលមានភាពចម្រុះ បរិយាបន្ន និងឌីជីថល។ វីដេអូឯកសាររបស់មជ្ឈមណ្ឌលភាសា Aii «យើងជាស្ត្រី» គឺជាភស្តុតាង ដោយបានបង្ហាញពីឧបសគ្គ និងភាពជោគជ័យរបស់ស្ត្រីនៅសម័យថ្មី។

វេទិកាសាធារណៈ «ជើងឯកនៃភាពចម្រុះនៅកន្លែងធ្វើការ» នេះគឺជាផ្នែកមួយនៃ «Road to 2 Decades» របស់ MJQE និង Aii ​ដែលជាការរាប់ថយក្រោយនៃកេរ្តិ៍ដំណែលអស់ជិត ២ទសវត្សរ៍ នៅក្នុងវិស័យអប់រំ។

Aii គឺជាគ្រឹះស្ថានអប់រំឈានមុខគេមួយនៅប្រទេសកម្ពុជា ដែលផ្តល់ជូននូវកម្មវិធី និងវគ្គសិក្សាយ៉ាងសម្បូរបែបលើជំនាញភាសាអង់គ្លេស ចិន និងថៃ។ ដោយមានការប្តេជ្ញាចិត្តយ៉ាងមុតមាំលើការផ្តល់ការអប់រំប្រកបដោយគុណភាព និងភាពជោគជ័យរបស់សិស្សានុសិស្ស Aii ទទួលបានកេរ្តិ៍ឈ្មោះ និងទំនុកចិត្តក្នុងការផ្តល់ការអប់រំលើជំនាញភាសា៕

សម្រាប់ព័ត៌មានបន្ថែមពី Aii សូមទំនាក់ទំនងមក៖

លោក ស៊ូ ពិសែន

ប្រធានផ្នែកផ្សព្វផ្សាយ និងទីផ្សារ

មជ្ឈមណ្ឌលភាសា អេ អាយ អាយ (Aii)

+855 12 920 028

pisen.sou@aii.edu.kh