ភ្នំពេញ ថ្ងៃទី១៨ ខែធ្នូ ឆ្នាំ២០២៣៖ មជ្ឈមណ្ឌលភាសា អេ អាយ អាយ (Aii) និង សាលារៀន អន្តរទ្វីប អាមេរិកាំង (AIS) ដែលជាក្រុមហ៊ុនបុត្តសម្ព័ន្ធរបស់ ក្រុមហ៊ុនម៉េងលី ជេ. គួច អេឌ្យួខេសិន (MJQE) បានសម្រេចសមិទ្ធផលដ៏ធំមួយទៀតក្នុងដំណើរផ្តល់ការអប់រំប្រកបដោយគុណភាពជូនដល់យុវជនកម្ពុជា។ ពួកគេបានចាប់ផ្តើមសាងសង់បរិវេណសាលាថ្មី និងធំជាងនេះនៅតំបន់ចោមចៅ ដែលនឹងទទួលសិស្សបានកាន់តែច្រើន និងផ្តល់ឱកាសកាន់តែច្រើនសម្រាប់ការរៀនសូត្រ និងការរីកចម្រើន។
បរិវេណសាលាថ្មីនឹងមានអគាររាងអក្សរ U ដែលតំណាងឱ្យបេសកកម្មរបស់ Aii និង AIS ក្នុងការបង្កើត និងបង្កើនសហគមន៍អ្នកសិក្សាសម្រាប់សតវត្សរ៍ទី ២១។ បរិវេណសាលា និងនៅក្នុងថ្នាក់រៀននឹងបំពាក់ដោយបរិក្ខារទំនើបៗ ទីលានសម្រាប់សកម្មភាពកីឡាដ៏ធំទូលាយ មជ្ឈមណ្ឌលសិល្បៈ អាហារដ្ឋានAlex Food Court ហាងកាហ្វេRooster Café ហាងSmart Mart និងបណ្ណាគារអ៊ិនធឺខន។
នេះជាអគារទី៣ របស់សាលា Aii និង AIS សាខាចោមចៅ ដែលនឹងសាងសង់លើផ្ទៃដីទំហំ ៣ ហិកតា ខណៈដែលអគារសិក្សាទាំង២ដែលមានស្រាប់បានពេញ ដោយសារតែមានកំណើនសិស្សានុសិស្ស។ កន្លែងដំបូងបានសាងសង់រួចរាល់អស់ហើយ។ បន្ទាប់ពីការបើកដំណើរការដោយជោគជ័យនៃសាខាតាកែវ សាខាសែនសុខ និងសាខាច្បារអំពៅនៅក្នុងឆ្នាំ ២០២៣ មក ឥឡូវនេះ គ្រឹះស្ថានអប់រំឈានមុខគេនៅកម្ពុជានេះបានបន្តពង្រីកវិសាលភាពនៅក្នុងតំបន់ចោមចៅបន្ថែមទៀត៕
