Aii ដែលជាស្ថាប័នភាសាឈានមុខគេក្នុងប្រទេសកម្ពុជាបានស្វាគមន៍ដំណើរទស្សនកិច្ច របស់ស្ថាប័ន Sekolah Menengah Kebangsaan Jalan Tiga Bandar Baru Bangi (JATISS) មកពីប្រទេសម៉ាឡេស៊ី។ ដំណើរទស្សនកិច្ចសាលានេះមានគោលបំណងជួយសម្រួលដល់ការភ្ជាប់ទំនាក់ទំនងការវាយតម្លៃ និងគម្រោងសហការនាពេលអនាគតរវាងស្ថាប័នទាំងពីរទន្ទឹមនឹងនោះក៏ផ្តល់នូវវេទិកាមួយដើម្បីចែករំលែកការយល់ដឹង និងព័ត៌មានអំពីនិន្នាកាថ្មីៗក្នុងការបង្រៀន និងរៀនភាសាអង់គ្លេសផងដែរ។
ក្នុងដំណើរទស្សនកិច្ចនេះក៏មានការចែករំលែកព័ត៌មាន ដែលត្រូវបានធ្វើឡើងដោយផ្តោតលើប្រធានបទសំខាន់ៗទាក់ទងនឹងការសិក្សាភាសា។ លោកស្រីបណ្ឌិត Khairul Husna AbdulKadir មកពីប្រទេសម៉ាឡេស៊ីបានធ្វើបទបង្ហាញមួយក្រោមចំណងជើងថា "English Teaching and Learning in Malaysia: Navigating the Roadblock and the Roadmap” ដែលផ្តល់នូវការយល់ដឹងដ៏មានតម្លៃចំពោះបញ្ហាប្រឈម និងយុទ្ធសាស្ត្រនៅក្នុងបរិបទប្រទេសម៉ាឡេស៊ី។ លើសពីនេះកញ្ញា Joanna Cabredo មកពីមជ្ឈមណ្ឌលភាសា Aii បានចែករំលែកនូវយុទ្ធសាស្ត្រ និងបច្ចេកវិទ្យាប្រកបដោយភាពច្នៃប្រឌិតសម្រាប់ការពង្រឹងជំនាញសរសេរភាសាអង់គ្លេសនៅក្នុងបទបង្ហាញមួយដែលមានចំណងជើងថា "Unlocking English Writing Skills: Innovative Strategies and Technology for Teachers"។
តាមរយៈការចែករំលែកជំនាញ និងបទពិសោធន៍នេះស្ថាប័នទាំងពីរមានគោលបំណងលើកកំពស់កម្មវិធីរៀងៗខ្លួន និងរួមចំណែកដល់ការរីកចំរើននៃការអប់រំភាសា។ ដំណើរទស្សនកិច្ចនេះធ្វើឡើងដោយការខិតខំប្រឹងប្រែងរបស់គណៈកម្មាធិការសាលានៃសាខាAii ម៉ៅសេទុង។