រាជធានីភ្នំពេញ ថ្ងៃទី២២ ខែកុម្ភៈ ឆ្នាំ២០២៤៖ មជ្ឈមណ្ឌលភាសា អេ អាយ អាយ (Aii) ដែលជាបុត្រសម្ព័ន្ធរបស់ក្រុមហ៊ុន ម៉េងលី ជេ. គួច អេឌ្យូខេសិន (MJQE) និងជាគ្រឹះស្ថានអប់រំឈានមុខគេមួយនៅក្នុងប្រទេសកម្ពុជា បានបោះជំហានយ៉ាងសំខាន់មួយឆ្ពោះទៅរកការអភិរក្ស និងតម្កើងមរតកវប្បធម៌ជាតិតាមរយៈការលើកទឹកចិត្តបុគ្គលិក និងនិយោជិតទាំងអស់ឱ្យស្លៀកសម្លៀកបំពាក់ប្រពៃណីខ្មែរនៅក្នុងកន្លែងធ្វើការ។ ចាប់ពីថ្ងៃទី០៥ ខែមីនា ឆ្នាំ២០២៤នេះតទៅ នៅរៀងរាល់ថ្ងៃអង្គារ និងថ្ងៃព្រហស្បតិ៍ គឺជា«ទិវាសម្លៀកបំពាក់ប្រពៃណី» ដែលគ្រប់គ្នាត្រូវបានលើកទឹកចិត្តឱ្យបង្ហាញនូវមរតកដ៏សម្បូរបែបនៃប្រទេសកម្ពុជាតាមរយៈការស្លៀកសម្លៀកបំពាក់ប្រពៃណី។
ការថែរក្សា និងការប្រារព្ធនូវអត្តសញ្ញាណវប្បធម៌ជាតិកម្ពុជានៅក្នុងកន្លែងធ្វើការនេះ ពិតជាមានសារៈសំខាន់សម្រាប់ Aii ដោយមានអ្នកឧកញ៉ា វេជ្ជបណ្ឌិត គួច ម៉េងលី ជាអ្នកផ្តួចផ្តើម និងផ្តល់ជាឧទាហរណ៍ទៅកាន់បុគ្គលិក។ Aii សង្ឃឹមថានឹងជួយបង្កើនមោទកភាព និងការរួបរួមគ្នានៅកន្លែងធ្វើការរវាងបុគ្គលិកទាំងអស់តាមរយៈការស្លៀកសម្លៀកបំពាក់ប្រពៃណីខ្មែរនេះ។
លោក ឡាយ សុភា ប្រធានមជ្ឈមណ្ឌលភាសា Aii បានមានប្រសាសន៍ថា៖ «ការផ្សព្វផ្សាយសម្លៀកបំពាក់ប្រពៃណីខ្មែរនៅក្នុងស្ថាប័នរបស់យើង មិនមែនត្រឹមតែជាសម្លៀកបំពាក់ប៉ុណ្ណោះទេ ប៉ុន្តែវាគឺជាការទទួលស្គាល់ និងលើកតម្កើងមរតកវប្បធម៌ជាតិយើង។ តាមរយៈការលើកទឹកចិត្តបុគ្គលិក និងនិយោជិតរបស់យើងឱ្យស្លៀកពាក់បែបប្រពៃណី យើងចង់បង្កើតបរិយាកាសរួបរួម អបអរភាពចម្រុះ និងភាពសម្បូរបែបនៃវប្បធម៌ខ្មែរយើង។ វាក៏ដើរតួនាទីក្នុងការរម្លឹកពីការប្តេជ្ញាចិត្តរបស់យើងក្នុងការអភិរក្ស ថែរក្សា និងលើកតម្កើងមរតកវប្បធម៌ដ៏ល្អឯករបស់យើងផងដែរ។»
ការផ្តូចផ្តើមនេះ ឆ្លុះបញ្ចាំងពីការប្តេជ្ញាចិត្តរបស់ Aii ក៏ដូចជាក្រុមហ៊ុនមេ MJQE ក្នុងការថែរក្សា និងអភិរក្សវប្បធម៌ខ្មែរ ផ្អែកលើកភាពជឿជាក់យ៉ាងមុតមាំថា ការរក្សា និងលើកតម្កើងមរតកវប្បធម៌ គឺជាកត្តាចាំបាច់សម្រាប់កសាងសង្គមឱ្យកាន់តែរឹងមាំ និងមានឯកភាព។
Aii គឺជាគ្រឹះស្ថានអប់រំឈានមុខគេមួយនៅប្រទេសកម្ពុជា ដែលផ្តល់ជូននូវកម្មវិធី និងវគ្គសិក្សាយ៉ាងសម្បូរបែបលើជំនាញភាសាអង់គ្លេស ចិន និងថៃ។ ដោយមានការប្តេជ្ញាចិត្តយ៉ាងមុតមាំលើការផ្តល់ការអប់រំប្រកបដោយគុណភាព និងភាពជោគជ័យរបស់សិស្សានុសិស្ស Aii ទទួលបានកេរ្តិ៍ឈ្មោះ និងទំនុកចិត្តក្នុងការផ្តល់ការអប់រំលើជំនាញភាសា៕
សម្រាប់ព័ត៌មានបន្ថែមពី Aii សូមទំនាក់ទំនងមក៖
លោក ស៊ូ ពិសែន
ប្រធានផ្នែកផ្សព្វផ្សាយ និងទីផ្សារ
មជ្ឈមណ្ឌលភាសា អេ អាយ អាយ (Aii)
+855 12 920 028
pisen.sou@aii.edu.kh